✍ ظفر احمد خان ندوی 

چھبرا ، ڈاکخانہ دھرم سنگھوا بازار، سنت کبیر نگر یو پی 

الحمداللہ وحدہ و الصلاة و السلام علی من لا نبی بعدہ امابعد:عن أبي هريرة أن رسول الله صلى الله عليه وسلم قال : " لا ينظر الله يوم القيامة إلى من جر إزاره بطرا "(بخاری ومسلم)، و عن ابن عمر أن النبي صلى الله عليه وسلم قال : " من جر ثوبه خيلاء لم ينظر الله إليه يوم القيامة "(بخاری و مسلم)۔

●  عہد نبوی میں عرب متکبرین کا یہ فیشن تھا کہ کپڑوں کے استعمال میں بہت اسراف سے کام لیتے تھے اور اس کو بڑائی کی نشانی سمجھتے تھے، ”ازار“ یعنی تہبند اس طرح باندھتے تھے کہ چلنے میں نیچے کا کنارہ زمین پر گھسٹتا تھا، اسی طرح قمیص اور عمامہ اور دوسرے کپڑوں میں بھی اسی قسم کے اسراف کے ذریعہ اپنی بڑائی اور چودھراہٹ کی نمائش کرتے، گویا اپنے دل کے استکبار اور احساس بالاتری کے اظہار اور تفاخر کا یہ ایک ذریعہ تھا، اور اس وجہ سے متکبرین کا یہ خاص فیشن بن گیا تھا، رسول اللہ صلی اللہ علیہ وسلم نے اس کی سخت ممانعت فرمائی اور نہایت سنگین وعیدیں اس کے بارے میں سنائیں: 

● رسول کریم صلی اللہ علیہ وسلم نے فرمایا ۔" اللہ تعالیٰ قیامت کے دن اس شخص کی طرف (رحمت کی نظر سے ) نہیں دیکھے گا، جو غرور و تکبر سے اپنی ازار (یعنی پائجامہ و تہبند ) کو (ٹخنوں سے نیچے ) لٹکائے گا ۔" (بخاری ومسلم )۔ اور دوسری حدیث میں  آپ صلی اللہ علیہ وسلم نے فرمایا ۔ "جو شخص غرور و تکبر کے طور پر اپنے (بدن کے ) کپڑے کو زمین پر گھسیٹتا ہوا چلے گا قیامت کے دن اللہ تعالیٰ اس کی طرف (رحمت و عنایت کی نظر سے ) نہیں دیکھے گا ۔" (بخاری ومسلم )۔

               ان احادیث میں فخرو غرور اور گھمنڈ و تکبر والا لباس استعمال کرنے والوں کو یہ سخت وعید سنائی گئی ہے کہ وہ قیامت کے اس دن میں جب کہ ہر بندہ اپنے ربِ کریم کی نگاہِ رحم وکرم کا سخت منتظر و محتاج ہوگا، اللہ تعالی اس کی طرف رحم و کرم کی نگاہ نہیں ڈالیں گے اور وہ لوگ اس کی نگاہِ رحمت سے محروم رہیں گے، اللہ تعالیٰ اس دن ان کو بالکل ہی نظر انداز کردے گا، ان کی طرف نظرکرم بھی نہ فرمائے گا، ایسی محرومی و بدبختی سے اللہ ہم سب کی حفاظت فرمائے، آمین ۔ ان احادیث کا یہ مطلب نہیں کہ جو تکبر کے ارادے سے لٹکاتا ہے ، وہ اس وعید میں داخل ہوگا ، بلکہ اس کا مطلب یہ ہے کہ جو انسان جان بوجھ کر کپڑا ٹخنوں سے نیچے لٹکاتا ہے ، خواہ تکبر کا قصد ہویا نہ ہو ، اس کے لیے یہ وعید ِ شدید ہے ۔ ہاں ! اگر کوئی آدمی کپڑا ٹخنوں سے اوپر رکھنے کی پوری پوری کوشش کرتا ہے ، لیکن اس کے باوجود غیرارادی یا غیراختیاری طورپر کپڑا نیچے لٹک جاتا ہے تو وہ اس وعید میں داخل نہیں ہوگا ، کیونکہ وہ معذور ہے، جیسا کہ ایک حدیث میں ہے، 

● عَنِ ابْنِ عُمَرَ، عَنِ النبي صلی اللہ علیہ وسلم قال: مَنْ جَرَّ ثَوْبَہ خُیَلَاءَ لَمْ یَنْظُرِ اللّٰہُ إلیہ یومَ القیامةِ، فقالَ أبو بکرٍ: یا رسولَ اللّٰہِ إزارِيْ یَسْتَرْخِيْ إلاَّ أنْ أتَعَاہَدُہ، فقالَ لَہ رسولُ اللّٰہِ ﷺ: إنَّکَ لَسْتَ مَنْ یَفْعَلُہ خُیَلَاءَ․ (بخاری)

            حضرت عبد اللہ بن عمر رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا کہ "جو کوئی فخرو تکبر کے طور پر اپنا کپڑا زیادہ نیچا کرے گا، قیامت کے دن اللہ تعالیٰ اس کی طرف نظر بھی نہیں کرے گا، حضرت ابو بکررضی اللہ عنہ نے عرض کیا: یا رسول اللہ! میرا تہبند اگر میں اس کا خیال نہ رکھوں، تو نیچے لٹک جاتا ہے، حضور صلی اللہ علیہ وسلم نے فرمایا: تم ان لوگوں میں سے نہیں ہو جو فخروغرور کے جذبہ سے ایسا کرتے ہیں"۔ حضرت ابوبکر  رضی اللہ عنہ  فرماتے ہیں کہ جب میں پوری پوری محافظت کرتا ہوں تو تہبند نیچے نہیں لٹکتا ۔ کبھی ذرا سی غفلت کروں تو نیچے لٹک جاتا ہے ۔ حدیث میں یسترخی     کا لفظ بھی اسی بات پر دلالت کرتا ہے کہ تہبند خود بخود نیچے لٹک جاتا تھا ، وہ بھی کبھی کبھار نہ کہ ہمیشہ ۔ سیدنا ابوبکر  رضی اللہ عنہ  قصداً نہیں لٹکاتے تھے ۔ آپ  رضی اللہ عنہ  بھی سمجھتے تھے کہ یہ وعید ہر اس انسان کو شامل ہے ، جو تکبر کے ارادے سے لٹکایا ہے یا بغیر تکبر کے ارادے سے ۔ تب ہی تو یہ سوال کیا تھا کہ غیرارادی طور پر غفلت کی وجہ سے میرا تہبند لٹک جاتا ہے۔کیا میں بھی اسی وعید میں داخل ہوں ۔ آپ   صلی اللہ علیہ وسلم  نے فرمایا ، نہیں ۔

ہاں ! اگر حضرت ابوبکر  رضی اللہ عنہ  یہ پوچھتے کہ میں خود شلوار ٹخنے سے نیچے لٹکا کر رکھتا ہوں اور میرا تکبر کا ارادہ نہیں ہوتا ، پھر اگر آپ   صلی اللہ علیہ وسلم  اجازت دے دیتے تو بات صحیح ہوتی ، جبکہ یہاں ایسی کوئی بات نہیں ہے ،لہٰذا یہ حدیث اس بات پر دلالت کرتی ہے کہ جو جان بوجھ کر کپڑا لٹکاتا ہے، خواہ تکبر کا ارادہ نہ بھی ہو ، وہ اس وعید میں داخل ہے ، کیونکہ ٹخنے سے نیچے کپڑا لٹکانا بذات ِ خود تکبر ہے ۔ اس میں قصد وارادہ کا کوئی عمل دخل نہیں ۔

             اب اگر کوئی شخص کہے کہ میرا کپڑا تکبر کی وجہ سے نہیں بلکہ ویسے ہی لٹکا ہوا ہے تو اس کی یہ بات غیر مقبول ہے اور اس کی یہ دلیل اور صفائی مردود ہے کیونکہ بہت ساری احادیث میں کپڑا ٹخنوں سے نیچے کرنے پر وعید آئی ہے اس میں غرور تکبر اور گھمنڈ کی کوئی قید نہیں ہے لهذا تکبر کی نیت ہو یا نہ ہو دونوں صورتوں میں ٹخنوں سے نیچے کپڑا لٹکانا حرام ہوگا البتہ اگر تکبر کے ساتھ هو تو عید اور سزا مزید سخت ہو گئی۔ یہاں ٹخنوں سے نیچے کپڑا لٹکانے سے متعلق دو تین احادیث ذکر کی جاتی ہیں جس میں فخر و غرور اور گھمنڈ اور تکبر کی کوئی قید نہیں ہے ، مطلقا ازار ٹخنوں کے نیچے لٹکانے پر وعید سنائی گئی ہے  جس سے اندازہ ہوتا ہے کہ فخر و غرور گھمنڈ اور تکبر کی قید کا سہارا لیکر جو لوگ حلیہ تراشی اور بہانے بازی کرتے ہیں ان کی یہ کوشش عبث ہے، 

● عن أبي هريرة رضي الله عنه  قال، عن النَّبيِّ ﷺ قَالَ: مَا أَسْفَلَ مِنَ الْكَعْبَيْنِ مِنَ الإِزار فَفِي النَّار (رواه البخاري). حضرت ابوہریرہ  رضی اللہ عنہ  سے روایت ہے کہ رسول اللہ   صلی اللہ علیہ وسلم نے فرمایا : ”ٹخنوں کے نیچے جسم کا وہ حصہ جہاں تہ بند پہنچے ، وہ آگ میں جلے گا"

           مطلب یہ ہے کہ ٹخنوں سے نیچے پیر کے جتنے حصہ پر تہبند وغیرہ لٹکا ہوا ہو گا وہ پورا حصہ دوزخ میں ڈالا جائے گا ۔ بعض حضرات نے یہ مطلب بیان کیا ہے کہ یہ عمل یعنی ٹخنے سے نیچے تہبند وغیرہ لٹکانا) ایک مذموم عمل ہے اور دوزخیوں کا کام ہے ٹخنے سے نیچے ازار وغیرہ لٹکانے کے مسئلہ میں یہ بات واضح رہنی چاہئے کہ اس سلسے میں جو احادیث منقول ہیں ان میں زیادہ تر ازار کے لٹکانے کا ذکر ہے اور ازر لٹکانے والے کے حق میں بہت سخت وعیدیں بھی بیان کی گئی ہے یہاں تک کہ ایک روایت کے مطابق نبی کریم صلی اللہ علیہ وسلم نے ایک دن ایک شخص کو اس حال میں نماز پڑھتے دیکھا کہ اس کے پائچے ٹخنوں سے نیچے تھے تو أپ صلی اللہ علیہ وسلم نے اس کو دوبارہ وضو کرنے اور نماز لوٹانے کا حکم دیا،  حقیقت یہ ہے کہ ان ساری وعیدوں اور ممانعت کا تعلق محض ازار ہی سے نہیں ہے بلکہ سب کپڑوں سے ہے یعنی بدن پر جو بھی کپڑا ضرورت سے زائد اور سنت کے دائرے سے باہر ہو گا اس پر مذکورہ ممانعت کا حکم عائد ہو گا جہاں تک ازار کی تخصیص کا تعلق ہے تو اس کی وجہ محض یہ ہے کہ اس زمانہ میں چادر اور ازار عام طور پر لباس ہوتا تھا اس لئے اس کے استعمال کی کثرت کی بنا پر اس کا ذکر کیا گیا، بہر حال عزیمت یعنی اولی درجہ یہ ہے کہ ازار یعنی تہبند وپائجامہ کو نصف پنڈلی تک رکھا جائے چنانچہ آنحضرت صلی اللہ علیہ وسلم اپنا تہبند نصف پنڈلی ہی تک رکھتے تھے البتہ رخصت یعنی اجازت وا سانی کا درجہ ٹخنوں تک ہے کہ تہبند و پائجامے کو زیادہ سے زیادہ ٹخنوں تک رکھا جا سکتا ہے کرتے و قمیص اور عباد شیروانی وغیرہ کے دامن کا بھی یہی حکم ہے اسی طرح قمیص و کرتے وغیرہ کی آستینوں کی مسنون لمبائی یہ ہے کہ وہ بندوست یعنی ہاتھ کے جوڑ تک ہوں عمامہ کا شملہ زیادہ سے زیادہ اتنا چھوڑاجانا چاہئے جو نصف پشت تک رہے جو شملہ لمبائی یا چوڑائی میں اس سے زائدہو گا وہ بدعت اور اس زائد لٹکانے میں شمار ہوگا جو ممنوع ہے چنانچہ بعض علاقوں اور شہروں کے لوگ اپنے لباس میں جو زائد از ضرورت کپڑا استعمال کرتے ہیں جیسے ضرورت سے زائد لمبی لمبی آستینوں اور وسیع و عریض دامنوں والے کرتے کئی کئی گز کے پاجامے اور شلواروں اور بڑے بڑے عمامے اور پگڑ کا رواج بعض جگہ پایا جاتا ہے وہ خلاف سنت ہے بلکہ یہ زائد از ضرورت کپڑے صرف کرنا اگر تکبر و غرور کی نیت سے ہو گا تو اس کو حرام کہیں گے اور اگر لوگوں کی دیکھا دیکھی یا کسی رواج کے تحت ہو گا تو اس کو مکروہ کہا جائے گا کپڑوں میں ضرورت سے زائد لمبائی چوڑائی رکھنا عورتوں کے لئے بھی ممنوع ہے لیکن مردوں کی بہ نسبت ایک بالشت کے بقدر زائد ہونا جائز ہے بلکہ اتنی زائد مقدار تو مستحب ہے جو پردہ پوشی کے بقدر ہو۔